A costa ficará unida por un camiño de 1.300 quilómetros

A conselleira de Medio Ambiente e Cambio Climático, Ángeles Vázquez, visitou hoxe as instalacións da antiga sede de Conservera Gallega -fundada pola familia Lafuente en Poio- onde salientou a aposta do Executivo galego por poñer en valor o litoral da comunidade e o rico patrimonio co que conta. Con ese obxectivo, destacou, a Xunta de Galicia investirá en 2026 arredor de 2 millóns de euros en habilitar o Camiño do litoral, unha senda que unirá a Galicia costeira de norte a sur na que a cidadanía poida coñecer a fondo a súa riqueza cultural, arquitectónica ou turística.

Esta visita enmárcase no retiro anual do Goberno galego que, nesta ocasión, se celebra no concello pontevedrés de Meis. Durante a súa visita, a conselleira subliñou que, tras asumir este ano a xestión plena do litoral, o próximo exercicio vai ser o do enaltecemento e difusión dos seus valores con accións como a creación desta senda que unirá Galicia desde Ribadeo ata A Guarda, a pé, e de Ribadeo ata Tui, en bicicleta.

Vázquez avanzou que o compromiso da Xunta é claro coa protección e posta en valor da costa, así como co seu desenvolvemento económico e social, ao que contribuirá este Camiño do litoral, que será o resultado da unión de tramos xa existentes con outros que servirán de conexión co fin de darlle continuidade e estendelos a toda a franxa costeira. Trátase dunha senda que contará con 52 etapas e 1.300 quilómetros e que se converterá na antesala doutras actuacións que está a preparar o Executivo galego de cara ao vindeiro ano Xacobeo (2027).

O fin último é conectar aínda máis o litoral co conxunto da cidadanía galega, para o que se está a deseñar unha guía para a sinalización deste camiño e o procedemento para contratar os diferentes traballos para colocala sobre o terreo, unha acción que conta cun orzamento de 200.000 euros. A maiores, en arredor do 20% da senda é preciso realizar distintas actuacións para o seu acondicionamento -limpezas ou rozas, e outras de maior calado para unir tramos- que comezarán o próximo ano e contarán cun orzamento de arredor de 1,7 millóns de euros. A súa execución realizarase de maneira que interfiran o mínimo posible nas diferentes etapas.

Este camiño, explicou Vázquez, pretende ser un camiño vivo que permita desfrutar, a pé ou en bicicleta, da costa galega, coñecer a comunidade a carón do mar e os tesouros que agocha. Precisamente, con ese mesmo obxectivo de poñer en valor a riqueza natural, cultural, etnográfica ou arquitectónica que se poderá atopar en cada etapa, a Xunta vai unificar nunha aplicación toda a información dispoñible e poñela a disposición do conxunto da cidadanía.