Facilitar o regreso dende o exterior coa seguridade dun emprego estable

As traxectorias de Marcio Rafael González Hurtado, Marisol Julieta Cainzos Lerga e Francisco Sánchez Ocando converxen na Galicia dos seus antepasados da man do Programa Retorna Cualifica Emprego da Xunta, impulsado dende a Consellería de Emprego, Comercio e Emigración, consolidando o obxectivo da iniciativa, que pasa por facilitar o regreso dos descendentes de galegos coa seguridade dun traballo estable. Os tres atoparon o seu fogaro e o seu destino laboral na provincia de Ourense, unidos pola súa nova profesión como carniceiros en diferentes establecementos da cadea de supermercados Vegalsa-Eroski.

O valor diferencial do programa reside na xestión integral do proceso migratorio, transformando o retorno nunha experiencia coordinada e afastada da incerteza.

Coordinación loxística

O medo a chegar “á nada” é un dos maiores obstáculos que se presentan cando unha persoa toma a decisión de deixar o seu fogaro para emprender unha nova vida lonxe. Por iso, o Retorna Cualifica Emprego minimiza este impacto garantindo a loxística de principio a fin, tal e como aseguran os participantes. Marcio Rafael chegou a Maside dende Cuba lembrando que “xa tiña coordinado ata o taxi que me ía traer dende o aeroporto de Vigo ata Maside”. Ademais do traslado, o precontrato asinado permitiulle iniciar de inmediato unha “magnífica nova etapa” nunha vila con servizos completos, acompañado da súa muller, os seus fillos e tamén os seus pais.

No caso de Marisol Cainzos, neta de galegos de Mar del Plata e destinada no Barco de Valdeorras, o programa demostrou gran flexibilidade na loxística inicial. “O mesmo día que cheguei xa tiña onde vivir”. Esta rapidez permitiu que Marisol, que xa coñecera a Galicia dos seus ancestros con 15 anos a través do programa Conecta con Galicia desta mesma Consellería, comezase a traballar apenas catro días despois de poñer pé nos puntos destinados da provincia de Ourense.

Estabilidade laboral

A inserción laboral inmediata é o piar central do programa. Os tres foron seleccionados para postos de carniceiros nunha das principais cadeas de distribución en Galicia. Francisco Sánchez Ocando, fillo de galego do Saviñao e procedente de Venezuela, relata como a persistencia, tras un primeiro intento fallido de participar en Retorna Cualifica Emprego por ter o pasaporte caducado, conduciu a un proceso áxil de selección e contratación. Instalado en Ribadavia, goza agora da estabilidade. “Eu cheguei e aos dous ou tres días empecei a traballar”, explica. A pesar de ter experiencia previa, o programa garantiulle a formación para adaptarse ás técnicas e normativas “moi distintas” ás do seu país que se aplican en Galicia.

Marisol e Marcio están igualmente inmersos no proceso de formación, asegurando que non só acadan un posto de traballo, senón unha cualificación profesional. A traballadora procedente de Arxentina conta que “está a ser capacitada para ser unha empregada polivalente” na tenda do Barco.

O valor do acompañamento

Máis aló dos aspectos materiais, o factor humano é o máis prezado polos retornados. O seguimento constante dentro do programa da Xunta mitiga o choque cultural e a soidade, convertendo o proceso nunha transición tutelada. Así o contempla Francisco Sánchez, valorando o feito de que o programa “dáche a oportunidade de que o teu retorno non sexa tan traumático”. En todo momento se sentiu acompañado polos profesionais implicados na iniciativa, que “case todas as semanas me preguntaban como vai a cousa, como me sinto, que me fai falta… Iso non ten prezo”.

Algo semellante conta Marcio Rafael, referíndose a esta nova etapa en termos de liberdade e calidade de vida para a súa familia. “Isto é para min o máximo. A min déronme a oportunidade de facer un cambio de vida total, de que os meus fillos teñan un mellor futuro nun país de liberdade”.

En conxunto, estas tres historias en Maside, O Barco de Valdeorras e Ribadavia son a proba do bo funcionamento do programa Retorna Cualifica Emprego, que non só recupera talento e fortalece os lazos coa comunidade galega no exterior, senón que tamén garante a captación de talento para o ecosistema empresarial local ó tempo que garante unha estabilidade profesional para os descendentes daqueles que emigraron e tanto contribuíron co desenvolvemento do territorio na súa historia.