A firma galega Naffta vestirá o equipo español da Copa Davis

A marca galega de roupa deportiva Naffta vestirá os equipos españois da Copa Davis e da Copa Federación de tenis, despois do acordo rubricado na sede madrileña do Comité Olímpico Español.

Nel estiveron presentes o presidente da Federación Española de Tenis, José Luis Escañuela, a capitá do equipo español da Copa Davis, Gala León, o presidente do Comité Olímpico Español, Alejandro Blanco, e o conselleiro delegado de Naffta, Miguel Sainero.

Desde a súa sede central en Vigo, Naffta vestirá tanto os xogadores como os adestradores, médicos, capitáns, directores deportivos e persoal de apoio, así como as categorías sub 12, sub 14, sub 16, sub 18 e veteranos, tanto masculinas como femininas, ademais de árbitros e equipos de tenis en cadeira de rodas.

Como parte do acordo, Naffta comercializará a roupa baixo o nome de "colección RFET-Naffta", tanto a través de tendas físicas como na súa tenda virtual, informa nun comunicado.

A estrea en pista dos equipamentos femininos producirase no torneo da Copa Federación que nos vindeiros 7 e 8 de febreiro decorrerá na cidade romanesa de Galati.

Posteriormente, terá lugar en Madrid o acto de presentación oficial de todos os deseños, precisa o comunicado da firma galega.

Naffta foi fundada en 1996 e ten a sede central en Vigo, onde dá emprego a 30 persoas. A súa roupa é distribuída fundamentalmente en Europa e nos Estados Unidos.