Gonzalo Caballero: "Estou disposto a traballar para conseguir que o PSdeG volva crecer"

Gonzalo Caballero Míguez é docente e investigador de Economía Aplicada na Universidad de Vigo. Ten unha ampla traxectoria en política que o levou a desempeñarse como concelleiro do Concello de Vigo, deputado no Parlamento de Galicia e como secretario xeral do PSdeG entre o 8 de outubro de 2017 e o 8 de decembro de 2021.

Vostede foi líder dos socialistas galegos. Pretende retomar ese liderado?

Eu teño unha vida adicada á universidade, onde son docente, investigador. Estou satisfeito. Teño unha boa etapa persoal, e polo tanto é onde vou centrar a miña actividade. Pero eu teño tamén unha bocación política intensa, un compromiso con Galicia… Dende logo me doe como está o PSdeG e eu estou disposto a traballar para conseguir que o PSdeG volva crecer electoralmente como creceu cando eu estiven á fronte da organización e deixe atrás esta fase de batacazos electorais que nos están convertendo nunha organización situada nun escenario de irrelevancia política.

Fai uns días vostede publicou un gráfico que comparaba a situación do PSdeG con vostede e agora.

Hai tres anos que deixei a secretaría xeral do PSdeG e é tempo de facer balance. Despois de perder o Goberno presidido por Emilio Pérez Touriño o socialismo galego entrou nunha etapa de inestabilidade e de declive. Cando eu tomei a dirección do partido conseguimos empezar a remontar a situación. Crecimos en todas as eleccións que houbo mentres eu fun secretario xeral: nas xerais, nas europeas, nas municipais, tamén nas autonómicas. Aumentamos a porcentaxe de voto en todas as eleccións que houbo e no tempo no que eu estiven á fronte do PSdeG lle gañamos ao PP en dúas ocasións en Galicia. As únicas veces na historia de Galicia en que o PSdeG lle ganou ao PP. Iso refrendouse en que conseguimos gobernar en tres das catro deputacións, en cinco das sete grandes cidades. O PSdeG tiña impulso, tiña proxecto, tiña liderato. Hoxe o PSdeG no parlamento está co menor nivel de representación que tivo endexamáis. Hoxe o PSOE a nivel autonómico, en Galicia, ten o peor resultado que ten en toda España. É tempo de cambio, é tempo de impulsar un novo proxecto e eu vou remar onde me corresponda. Dende logo contribuirei co meu graniño de area.

É posible retomar eses resultados?

En política todo é posible. Hai que traballar e facelo ben. Creo que hai que ter en política en primeiro lugar un nivel de exemplaridade e honradez que sexa impoluto. Todos os representantes políticos teñen que amosar a súa exemplaridade, a súa honradez. Teñen que ter bolsillos de cristal, petos transparentes para que non haxa dúbidas. Eso é moi importante para fortalecer a democracia. Loitar contra a desigualdade que é o que a min máis me preocupa como socialista. Fortalecer o Estado de Benestar, apostar polos servizos públicos, permitir que ninguén quede atrás polas súas circunstancias de familia ou de saúde. Esa é unha sociedade máis igualitaria, máis forte e por iso é polo que hai que traballar. E eu creo que o PSdeG ten que apostar por esa liña, para contribuir ao progreso de España, de Galicia e tamén de Ourense. Eu fago un chamamento ao PSdeG para que de un paso adiante, para que aposte pola renovación, para que saia máis fortalecido.

As súas frases

“O PSdeG tiña impulso, tiña proxecto, tiña liderato”

“É tempo de cambio, é tempo de impulsar un novo proxecto e eu vou remar onde me corresponda”

“Ourense necesita un PSOE forte para conseguir cambiar o actual modelo de goberno que hai na cidade”

Hai algunha mensaxe a Ferraz?

Eu creo que a dirección federal errou nas súas apostas orgánicas feitas en Galicia. Errou hai tres anos apostando por un cambio que deu o meu relevo crendo que con outros líderes en Galicia iamos a ir mellor. O tempo demostrou que non. E errou tamén en apostar pola designación do que foi o candidato á presidencia da Xunta neste ano porque os galegos leváronos a un nivel de votos máis baixo que nunca na historia y polo tanto eu creo que o proxecto de Galicia hai que facelo en Galicia, o liderato en Galicia hai que facelo en Galicia con credibilidade, a pé de país, con capacidade de ter ideas, de ter proposta, de ter unha traxectoria. E eu dende logo que son un membro do PSOE, levo nesta formación trinta anos, pero sempre fun unha persoa de carácter independente, con lealdade á organización, pero tamén con independencia de pensamento.

Qué balance fai dos últimos meses?

A min preocúpame moito que o PP conseguise facer o relevo de Feijóo a Rueda con maiorías absolutas. Porque eu sei que o PP con Fraga conseguíu sacar maiorías absolutas continuas, porque eu sei que o PP con Feijóo conseguíu sacar maiorías absolutas continuas, porque temo que se o PSdeG non se renova, non se fortalece, non fai un cambio, non se revitaliza, o PP de Galicia ten un rodillo de maiorías que pode volver funcionar, e a min preocúpame porque son unha persoa de esquerdas, progresista, que quere un Goberno de cambio. Polo tanto eu vexo o que sucedeu este ano nos resultados autonómicos, no que o PSdeG caeu en cinco deputados, en cincuenta mil votos en Galicia e claro que me preocupa, porque na miña etapa sempre crecimos e eu tiven que afrontar unhas autonómicas moi difíciles en tempos de covid, e aínda así medramos por primeira vez dende a etapa de Touriño. Simplemente conseguimos crecer ao longo de toda a historia da autonomía galega coas candidaturas de Fernando González Laxe, de Emilio Pérez Touriño e coa miña. Eses foron os tres perfís que conseguiron que o PSdeG crecese nas autonómicas.

Manten contacto cos socialistas ourensáns? Hai crise no PSOE de Ourense? É un tema constante.

Non sigo o detalle do día a día. Eu o que sí quero decir e que coñezo ben a cidade de Ourense e a provincia de Ourense. Mentres fun secretario xeral crecimos en toda Galicia, pero crecimos especialmente en Ourense. Porque aquí tiñamos un deputado e comigo pasamos a dous. Tiñamos dous parlamentarios galegos e pasamos a tres. E sendo secretario xeral conseguimos que na cidade de Ourense o PSOE fose a primeira forza política en eleccións municipais o cal solamente ocurrira nunha ocasión hai máis de vinte anos. Temos que saber ler o que está acontecendo para conseguir ter unha candidatura nas próximas municipais que volva a ser quen de crecer. Fronte ao populismo do actual alcalde, que aproveitou os erros de grandes partidos como o PP ou o PSdeG para conseguir ter un resultado máis amplo do que cabía esperar, é bo un cambio para Ourense. A min preocúpame a provincia de Ourense e preocúpame a cidade de Ourense, que é unha das grandes cidades de Galicia e que necesita un PSOE forte para conseguir cambiar o actual modelo de goberno que hai na cidade.