Turismo rural no verán do 2024, atractivos e novas experiencias en Ourense e Galicia

O director de Turismo de Galicia, Xosé Merelles, e o presidente da Federación Galega de Turismo Rural (Fegatur), Francisco Xabier Almuíña Chorén, presentaron na casa rural das Xacias, en Chantada, a colaboración para a promoción do turismo rural e a comercialización dixital dos aloxamentos rurais de Galicia entre ambas entidades. No acto, Xosé Merelles animou a escoller este verán o turismo rural para seguir diversificando a oferta e aproveitar as novas experiencias que se van poñer en marcha ao abeiro desta colaboración “sobre a base da sustentabilidade e a calidade”, indicou.

O director de Turismo de Galicia destacou que esta iniciativa engade “un valor significativo de carácter estratéxico no eido económico, social e do patrimonio natural e cultural do rural galego”. Tamén puxo en valor a idoneidade da mesma na medida en que supón, dixo, a creación de experiencias, a xeración de ofertas diferenciadoras para distintos públicos e o fomento da cooperación público-privada.

“No noso modelo de turismo diversificado, este ano queremos animar tamén a que as persoas se aloxen no noso rural en verán”, engadiu recordando o lema da campaña para este ano ‘Pídeche Galicia’ que vén de lanzarse e promove o destino Galicia como un lugar sostible no que desconectar. "Queremos chegar con ela ao mercado nacional e, no internacional a Estados Unidos e mercados emisores importantes para Galicia como Gran Bretaña, Portugal, Francia, Italia ou Alemaña", indicou.

Tres liñas estratéxicas

O acordo asinado entre Turismo de Galicia e Fegatur, no que a Xunta inviste cento vinte mil euros, implica a execución de accións en torno a tres liñas estratéxicas: a promoción do consumo do turismo rural, a formación e a comercialización dixital das experiencias e propostas de relax e aloxamento.

Neste sentido, propostas coma ‘O valor da experiencia rural’ que inclúe tamén ‘Saberes, sentires e sabores’, ‘Galicia, turismo Rural Sostible’ e ‘Benestar para estar ben’ servirán para poñer en valor a relación que existe entre os aloxamentos de turismo rural e o enogastroturismo, a saúde e benestar, a cultura e o patrimonio da comunidade.

O acordo tamén inclúe propostas en materia de formación coma o programa ‘Ollando o Turismo rural canda a quen vive e sabe del’, que achega coñecemento e mellora na profesionalización das persoas propietarias de establecementos de turismo rural, e a comercialización dixital de experiencias e aloxamentos a través da plataforma galiciaturismorural.es e outras accións de promoción máis tradicionais.