Arquivan a causa contra Félix Rubial pola morte de dous pacientes con Hepatite C

O Xulgado de Instrución número 3 de Santiago de Compostela decretou o sobresemento provisional da causa e arquivo das actuacións respecto dos cargos do Sergas (Félix Rubial e Carolina González-Criado) investigados como presuntos responsables de delitos de homicidio por imprudencia grave profesional e prevaricación por supostamente non facilitar o tratamento a pacientes de Hepatite C.

"Non podemos afirmar que a morte ou falecemento dos pacientes sexa imputable causalmente aos investigados", indica o fallo, do que informou o Tribunal Superior de Xustiza de Galicia (TSXG). Nel, engádese que "o falecemento sobreveu por causas alleas á demora, omisión ou dilación na tramitación das peticións ou solicitudes de aplicación dos novos fármacos".

O xuíz Andrés Lago Louro destaca que os medicamentos "se achaban aínda en fase case experimental e cuns resultados que aínda eran incertos, de aí a necesidade de que as autoridades sanitarias deseñasen mecanismos ou procedementos destinados a precisar con sumo coidado aqueles casos nos que estaría indicada a súa aplicación".

O auto, que pode ser recorrido, sinala que tampouco se pode concluír que, de aplicarse aos pacientes os novos fármacos, evitouse o seu falecemento.

"Se analizamos o exhaustivo informe que foi emitido polo Instituto de Medicamento Legal de Galicia (Imelga), a conclusión que se extrae é que o falecemento dos pacientes produciuse por causas alleas á subministración dos novos fármacos", recalca o xuíz, que engade que do informe forense se infire que os novos tratamentos antivirais "o que conseguían era unha eficacia moi alta á hora de eliminar o virus da Hepatite C, pero iso non quere dicir que os pacientes se curasen".