Bágoa: música concepto

Acaso máis popular no mundo rockero como guitarrista de Stormseeds, banda coa que adoita protagonizar a noite ourensá, David Fernández Bueno tamén conta cun proxecto personalísimo: Bágoa. E con este proxecto o compositor e instrumentista lanza agora mesmo o disco “Negro sobre luz”.

Pero, como nace Bágoa?

David dixit: “Nace, como concepto, sobre o ano 2011 aínda que daquelas non era un proxecto musical. Comezou chamándose Tears of Grey, por a influencia da música en inglés. Usaba ese nome para realizar traballos musicais pequenos, bocetos do que viría máis adiante, e para canalizar inquietudes como a fotografía, a poesía ou o debuxo. Co tempo foise centrando máis nun proxecto musical, xa que podía combinar música e escritura para as letras e fotografía e debuxos para as artes do CD”.

A diferenza do que ocorre con Stormseeds, Bágoa é un proxecto centrado “na composición e na edición de CD’s físicos, pero non se pensou nunca en levarlo ao directo”, segundo o músico.

Para profundar máis no carácter conceptual da iniciativa, hai que dicir que Esgos, a vila onde vive, é a peza central da temática de todo o que fai e a súa influencia vese na súa obra. Desta forma, en 2016 edita o seu primeiro traballo, “Session t(h)ree E.P.”. “Trátanse de cinco temas compostos nunha parte do río Grañal en Esgos e gravados nunha toma tamén nese mesmo sitio do bosque. Nel so hai guitarra, voz e os sons do río e dos paxaros que poideran colarse ese día”, detalla.

En 2019 lanza o segundo traballo, “There. In Silence”, con tres temas instrumentais que ían acompañados na edición física dun pequeño poema para cada un. “Aquí a cousa comea a cambiar e, pese a seguir co nome do proxecto e do CD en inglés, os poemas xa están en galego -explica-. O mesmo acontece con ‘Orbs’, una canción tamén instrumental lanzada en 2021 baixo o mesmo sistema: canción instrumental acompañada dun poema escrito nunha tarxeta”.

Finalmente, David decide galeguizar todo e é cando o nome pasa a ser Bágoa e, as canción, salvo alguna excepción, xa son en galego.

Tal é o caso de “Negro sobre luz”, o traballo que acaba de lanzar e no que colaboraron músicos colegas como Marws, Diego BF, María Mendoza, Adrián Rego, Eve, Erwan Jallais, Sanny, Alfredo Egaña e Alejandro Oviedo. Todos con liberdade de composición.

Por que o cambio ao galego?

Foi gradual. Ao ser un proxecto persoal, facelo noutra lingua deixou de ter sentido completamente. Trátase de ser eu, e eu falo galego asique é a mellor forma de expresarme é esa. É infinitamente máis auténtico.