"Loita Amada", o novo proxecto de Jásper

Tras ser protagonista na música galega con N.A.O., Xenreira, ou A Matraka Perversa, Jásper ten novo proxecto, Loita Amada, para o que sumou á pandereteira Nébeda Piñeiro e que presentará en Ourense -no Café Cultural Auriense- este sábado 18 de marzo.

O teu anterior proxecto, N.A.O., despediuse ao grande. Por que o deixaches cando mellor ía?

Por romanticismo. Decidimos deixalo no noso mellor momento para que o que se quedara na memoria da xente que nos seguiu fose iso: a dunha banda coherente e con forza; non a dunha banda que esmorece coa decandencia dos anos, malos discos e disputas internas. Certas dinámicas dentro da banda ó longo dos anos tamén desgastaron e motivaron esta decisión consensuada. Todo debe ter un principio e debe ter un fin.

Por que o nome de Loita Amada e como foi a elección da túa parteneire?

É un xogo de palabras para quenes nos criamos na Galiza dos anos 80. Amor a loita, loitar a través do amor que sentes, non do odio. Eu sempre digo que o proxecto político que defendemos parte do amor: á cultura, á lingua, á xente, á historia, á nosa matria. Terra, ao noso pobo e a nosa clase. A escolla de Nébeda foi por similitudes ideóloxicas. Temos un xeito de ver o mundo e a música moi similar, moita química e moita complicidade. Tamén porque quería que certas cancións bebesen da música tradicional galega, que tiveran máis raíz e para iso precisaba dalguén especializado nisto: ahí entra Nébeda que ten unha vagaxe cultural nese eido inmenso.

No teu cancioneiro hai letras reivindicativas a nivel social e cultura. Pódese cambiar algo desde a música?

Dicía Paulo Freire, pedagogo brasileiro: “Educação não transforma o mundo. Educação muda as pessoas. Pessoas transformam o mundo”. Nós aplicámolo coa música: A música non transforma o mundo, pero si as persoas para que transformen o mundo. Non hai maior honra que poder traballar dende o arte e a cultura para un ben maior que nos trascenda como artistas: a xustiza social, o ben común, a liberdade colectiva da nosa ben querida patria galega. Poder cambiar a vida das persoas para mellor: darlles azos, ilusión pola vida e o futuro.

Con que se vai a atopar o público que che vexa en Ourense?

Cunha banda de directo de oito músicos que fan unha festa de principio a fin. Cun repertorio dunha hora e media no que presentamos o disco, pero tamén cancións míticas de N.A.O., de Banda Bassotti, Fuxan os ventos ou Suso Vaamonde. Vai de menos a máis cunha enerxía que transmiste diversión.