“A música é sentimento”

Coa canción “I’ll have some money someday” como novidade, o ourensán Manuel Carballo comanda MCarballo desde 2007 con “as mesmas expectativas de sempre: poder saír a tocar e amosar cancións, compartilas co público compartindo enerxía fluíndo positivamente por ambos os lados”.

Ademais de compositor, voz e guitarra de MCarballo, proxecto ao que se suman David Outomuro en batería e percusión e Adrián Blanco en piano e hammond, Manuel -que conta no seu haber grupos como A banda do cruel e Sector límite rock, estudou informática, tivo o ciber máis popular de Ourense e rexentou o café Jam Session-, compaxina a música e as súas clases de artes plásticas e autor de traballos hiperrealistas cuxo requirimento xa excede os límites ourensáns.

-“I’ll have some money someday” é o adianto do teu próximo disco. Que podes contar do que vén? O anterior disco foi en castelán, pero tes antes moitas cancións en inglés. E agora?

-Non publicaremos un álbum físico polo momento. Seguiremos gravando máis cancións e publicándoas en plataformas dixitais para posteriormente recompilar e considerar que formatos físicos imprimir. Realmente non penso a lingua das cancións porque xorden nun idioma ou noutro sen unha orde ou intención establecida. As canciones xa gravadas e as que gravaremos son e nunha liña rock/blues cargada de enerxía.

-Tes unha longa traxectoria e moita experiencia na música, que expectativas tes respecto deste novo traballo?

-As expectativas foron sempre as mesmas: poder saír a tocar e amosar aquelas cancións que van saíndo, compartilas co público compartindo enerxía fluíndo positivamente por ambos os lados. A música é sentimento e saímos a compartilo.

-Que tanta relación hai entre os músicos ourensáns? Reúnense para falar sobre a situación da música ourensá ou intercambiar pareceres?

-Sempre tivemos boa relación, boas conversas e moi bos proxectos nesta cidade. É certo que é difícil sacar adiante un proxecto, buscar un local de ensaio e reunir as condicións para que soe na liña pensada, pero ao final, e con moito esforzo, saen grupos incribles e con propostas moi maduras que nos fan sentir a todos moi orgullosos de poder ofrecer tanta variedade.

-A partir da pandemia, alternas a música co ditado de clases de música e de pintura; como o compaxinas?

-Ben, non é doado abarcar varias facetas, pero voume organizando para sacar todo adiante con gran esforzo e traballo. Do traballo sae todo, así que a seguir con boa enerxía e a por novos retos cada día.