Catro novos detidos vinculados ao alixo de cocaína do 'Ratonero'

Catro persoas máis foron detidas pola súa posible vinculación co alixo de cocaína do atuneiro 'Ratonero', co que son nove os capturados ata o momento nesta operación. O pesqueiro foi interceptado no océano Atlántico pola Garda Civil e polo Servizo de Vixilancia Aduaneira cun alixo de cocaína 2.560 quilos a bordo.

O buque chegou o pasado martes ao porto de Vigo e os seus cinco tripulantes están xa en prisión.

A estes súmanse outros catro, tres deles arrestados pola policía xudicial portuguesa na illa de Madeira, e que viaxaban nunha planadora que embarrancou na praia, e tamén J.C., capturado pola Garda Civil e cuñado do patrón do pesqueiro.

As tres persoas arrestadas pola policía lusa estaban nun bar próximo á pensión na que se aloxaban no barrio de Machico, e son B.V.D., de Cambados, condenado xa a 12 anos na operación Nécora, e J.M.C.L. e J.A.B.P., de Vilanova, en liberdade provisional tras ser arrestado na operación Tabaiba.

Os tripulantes en prisión desde a chegada do buque a Vigo son J.L.D., patrón do 'Ratonero', con outros dous veciños do Grove: J.F.F.S. e A.G.P., e A.A.V.V., do Uruguai, e A.O.C., de Colombia.

A droga que traía o buque e que sería embarcada nalgún punto de Venezuela achábase nun total de 90 fardos con pesos cada un que oscilaban entre 30 e 40 quilos, que durante o día de onte foi queimada na central térmica das Pontes.

Segundo fontes da investigación, J.L.D. utilizou o seu cuñado J.C. en tarefas de vixilancia e seguridade e na adquisición da planadora.

J.C. encóntrase no cuartel da garda civil en Pontevedra e posiblemente mañá pasará a disposición xudicial.