A gaita volveu soar con forza na cima da montaña de Manzaneda

Un domingo máis de xullo, e un domingo máis cheo de música na cima da montaña. A estación de montaña de Cabeza Grande, en Manzaneda, converteuse de novo nun auténtico mar de gaitas e traxes tradicionais co Certame Celtibérico de Bandas de Gaitas, que celebrou a súa fase final, como xa é tradición desde hai dezaseis edicións. Alí, entre natureza, vento fresco e moita paixón pola cultura, xuntáronse arredor de 300 gaiteiros para compartir música e identidade.

A cita, xa convertida en referente no calendario musical galego, ten raíces fondas. O concurso de gaitas foi promovido fai preto de catro décadas polo inesquecible alcalde Gabino García xunto ao director da Real Banda de Ourense, Xosé Lois Foxo, e continúa vivo hoxe, convertido no certame celtibérico grazas ao apoio da Deputación de Ourense e o Concello de Manzaneda.

A el, a Gabino, dedicóuselle un ano máis a ofrenda floral que pechou a xornada. Tras esa homenaxe, chegou a entrega de premios e o momento culminante: o himno do Antigo Reino de Galicia, interpretado por todos os músicos ao unísono.

Como sempre, houbo que buscar algo de sombra, sobre todo os músicos, que entre camisas, faixas, chalecos e saias traen posta a tradición enriba, aínda que a temperatura foi moi agradable co fresco da serra. Pero entre nota e nota, a alegría era a mesma de sempre: a de manter viva unha herdanza que resoa fondo nas montañas. Porque en Manzaneda, cada verán, a gaita fala máis alto ca nunca.

A Real Xuvenil coróase nun certame cheo de talento gaiteiro

O protagonismo musical levouno a Real Xuvenil de Ourense, que acadou o primeiro posto absoluto en primeiro grao. A Banda Agarimo de Catabois, desde Ferrol, quedou segunda. En segundo grao, o premio foi para a Banda Municipal de Chantada, e en terceiro grao venceu San Pantaleón das Viñas, tamén de Ferrol, con Ladies Band de Ourense no segundo posto. En cuarto grao, brillou a Banda de Gaitas do Concello de Riós, seguida pola agrupación de Concello do Bolo, Preparatorio e Castrelo de Miño.

A nivel individual, o talento tamén tivo nome propio. Na categoría de gaiteiros solistas maiores de 18 anos, Florentino Pajarón proclamouse campión, seguido de Xavier Pérez, que acadou o segundo posto. Entre os maiores de 10 anos, a gaiteira Noa González levou o primeiro premio, mentres que Rosa María Carriba foi recoñecida como subcampioa. E na categoría de menores de 10 anos, o xurado destacou a interpretación de Mael Lombardero.