Manzaneda acolle un programa sobre emprendemento

O Concello de Manzaneda pon en marcha esta semana un programa de actividades participativas centradas no emprendemento innovador e na posta en valor dos recursos naturais da comarca. Estas iniciativas están dirixidas a persoas emprendedoras ou interesadas en desenvolver proxectos nos concellos de Caldelas, Trives e Valdeorras, e contarán coa participación de expertos e representantes institucionais vinculados á xestión do territorio e ao desenvolvemento rural.

A primeira das citas terá lugar este martes, 18 de febreiro, ás 12,00 horas no Centro Interxeracional de Manzaneda, coa presentación de Territorio Soutos, un proxecto que busca transformar o territorio mediante iniciativas sostibles baseadas no aproveitamento dos soutos e outros recursos autóctonos. O evento será conducido polo Polo de Emprendemento do Barco, a Fundación Ronsel e a entidade León Startup. Ademais haberá unha degustación de produtos locais, un espazo pensado para fomentar a xeración de sinerxías entre os asistentes, e quenes o desexen poderán unirse a unha camiñata circular de cinco quilómetros ata o Monumento Natural Souto de Rozavales, onde se atopa o milenario Castiñeiro de Pumbariños.

A segunda actividade desenvolverase o venres, 21 de febreiro, ás 19:00 horas, tamén no Centro Interxeracional de Manzaneda, coas Conversas no Macizo Central. Neste encontro presentarase o libro Nacenza e Curro da Mosenda. Compendio de fotografías, unha obra de Amador Lorenzo que documenta, desde 2014, a vida dos habitantes do Macizo Central de Queixa e Manzaneda e a súa estreita relación coa agricultura e a gandería. Ademais, neste evento organizaranse as primeiras actuacións para o acondicionamento dos curros de pastores da Mosenda e do Forxo, en colaboración cos gandeiros da zona.n