Manzaneda mellorará dúas das súas estradas

O Concello de Manzaneda vén de recibir a confirmación dunha nova achega económica da Deputación de Ourense, que destinará 100.000 euros a diferentes obras de mellora no municipio. A partida está incluída na modificación de crédito aprobada polo Pleno provincial o pasado venres, que supón un investimento total de 6,24 millóns de euros en diversos concellos ourensáns.

En concreto, os fondos asignados a Manzaneda permitirán levar a cabo tres actuacións prioritarias para a mellora de servizos básicos e infraestruturas locais.

A primeira delas será a execución dun novo pozo de barrena en Cimadevila, unha medida dirixida a garantir un subministro de auga máis estable e seguro, especialmente durante os períodos de seca. Esta obra responde a unha demanda veciñal e busca reforzar a rede municipal de abastecemento.

Outra actuación permitirá completar a estrada que conecta o núcleo de Cimadevila coa vía xeral. A primeira fase destas obras xa está adxudicada e coa nova achega rematarán o tramo restante, pavimentando todo o percorrido con aglomerado para mellorar o tránsito de vehículos, segundo sinalan desde o consistorio.

A terceira das intervencións previstas céntrase na mellora da estrada que une Raigada e O Bao, á que se destinarán arredor de 45.000 euros. Os traballos consistirán principalmente na execución de cunetas en formigón, co obxectivo de mellorar o drenaxe da vía e aumentar a súa durabilidade e seguridade, especialmente en épocas de choiva intensa.

Dende o Concello destacan que estas actuacións forman parte dun plan continuado de mellora das infraestruturas municipais, respondendo ás necesidades dos veciños.