Manzaneda reivindica a figura dos seus pastores

O Centro de Día de Manzaneda foi o escenario da xornada do ciclo “Conversas nas Raíces do Macizo Central”, unha iniciativa do Concello de Manzaneda para poñer en valor os aspectos senlleiros do seu territorio. Nesta ocasión, o evento estivo dedicado á figura dos pastores dos curros e contou coa presentación dos libros Nacenza e Curro da Mosenda, do fotógrafo Amador Lorenzo.

O autor, que leva retratando a vida e os habitantes do Macizo Central dende 2014, centrou a súa intervención nunha proxección de imaxes que reflectían a actividade gandeira e a singularidade dos curros. Durante a presentación, os propios pastores compartiron as súas vivencias, emocionando ao público coas súas historias e transmitindo o profundo vínculo que manteñen coa súa terra. Todos afirmaban que “isto tíñase que dar na escola”.

A segunda parte da xornada estivo dedicada á exposición dos proxectos de mellora e adecuación dos curros da Mosenda e do Forxo, grazas ao financiamento de Agader e da Deputación de Ourense, respectivamente. As actuacións previstas teñen como obxectivo mellorar a funcionalidade e a conservación ambiental destes espazos, respectando o seu uso tradicional durante o verán.

O evento pechouse cunha petiscada grupal, onde os asistentes continuaron debatendo sobre o futuro dos pastores e das tradicións gandeiras da zona.