Traballo e natureza van da man en Manzaneda

O Concello de Manzaneda foi escenario do programa de voluntariado interxeracional “VAI 2025”, unha iniciativa promovida pola Xunta de Galicia a través da Dirección Xeral de Xuventude e da Dirección Xeral de Patrimonio Natural, en colaboración co propio concello.

A actividade, celebrada nesta fin de semana, centrouse no coidado do Monumento Natural Souto de Rozavales, un espazo de gran valor ambiental e simbólico no territorio.

Durante dúas xornadas, sábado 5 e domingo 6 de xullo, 15 persoas voluntarias, de diferentes idades e procedencias, entregáronse con entusiasmo ao mantemento deste espazo natural tan singular. Polas mañás, entre as 10,00 e as 14,00 horas, dedicáronse a lixar e aplicar barniz protector á madeira da baranda que rodea ao milenario castiñeiro de Pumbariños, así como ao resto do mobiliario de madeira, como bancos e mesas, presentes no souto, rehabilitando así un dos espazos máis visitados no concello.

Pero o voluntariado foi moito máis ca traballo. Polas tardes, as persoas participantes tiveron a oportunidade de descubrir a riqueza cultural e paisaxística de Manzaneda da man do persoal do concello. Visitaron a vila medieval, pasearon entre os socalcos romanos que forman parte da Denominación de Orixe Ribeira Sacra e mesmo se achegaron ata o Santuario das Ermidas, xa no veciño concello do Bolo, para contemplar a paisaxe cara Manzaneda. A noite do sábado rematou cun paseo nocturno ao Bambán do Alto da Escrita e ao Curro da Chaira das Lamas, gozando da maxia do ceo estrelado e coñecendo a tradición dos curros e do pastoreo

Non faltou o tempo para o lecer e a convivencia. O venres á noite, na chegada, houbo unha sesión de contextualización sobre o territorio e o programa, seguida dunha festa de inauguración do bar da piscina, onde o grupo do voluntariado compartiu música, baile e bo ambiente con veciños e visitantes.

Desde o Concello de Manzaneda destacan e agradecen “o compromiso e o entusiasmo deste grupo de persoas voluntarias, que sen esperar nada a cambio axudaron a coidar un espazo tan valioso para nós como é o Souto de Rozavales. Tentamos devolverlles o xesto organizando paseos que lles permitiran coñecer Manzaneda máis alá da Estación de Montaña”.

Unha experiencia que combina coidado ambiental, patrimonio, convivencia interxeracional e descuberta do territorio, e que, sen dúbida, converterá a estas quince persoas en verdadeiras embaixadoras de Manzaneda.