O PP destaca en Montederramos os pasteiros para recuperar as zonas queimadas

Os parlamentarios populares Cristina Campero, Miguel Ángel Viso, José Luis Ferro e Víctor Baladrón, xunto cos concelleiros Manuel Rodríguez e Lorena Pérez, mantiveron o venres un encontro con gandeiros de Montederramo no que puxeron en valor a creación de pasteiros para a recuperación das zonas queimadas, nos que a Xunta investirá catro millóns este ano.

Os pasteiros son unha ferramenta para mellorar a dispoñibilidade de pastos de calidade para o gando, favorecer a recuperación de zonas queimadas e contribuír á prevención de futuros incendios ao crear áreas de descontinuidade vexetal.

Os deputados tamén visitaron varias explotacións gandeiras do concello para coñecer os danos ocasionados pola recente vaga de lumes e prestar apoio o seu para solicitar as axudas dispostas pola Xunta para avanzar na reparación dos danos.

Axudas tramitadas

A Consellería do Medio Rural xa atendeu a máis de 750 persoas afectadas polos lumes e tramitou ata o momento preto de 150 axudas directas a través das oito liñas de apoio destinadas a agricultores, gandeiros e titulares de montes, que cobren ata o 100 por cento do investimento necesario para recuperar infraestruturas, maquinaria, alimento ou produción perdida.