Cruz Vermella reforestará os montes comunais de Guimarei con 16.500 árbores

Representantes da Cruz Vermella, do Concello de Monterrei e da Comunidade de Montes da Farrapa e Guimarei presentaron onte un proxecto de reforestación con prantas forestais nunha extensión total de 15 hectáreas en montes comunais de Guimarei, para o que se empregarán un total de 16.500 árbores.

Esta iniciativa forma parte do proxecto de fixación de CO2, co que Cruz Vermella Española compensará a súa pegada de carbono a través do Plan +Compensa2, que consta de tres pasos: calcular emisións, reducilas ao mínimo e compensar as emitidas.

Estes montes en man común de Monterrei foron os escollidos, xunto a outras dúas zonas do norte peninsular en Navarra e Palencia, para realizar esta reforestación en 2024, cun investimento con fondos propios por parte de Cruz Vermello de arredor de 100.000 euros.

Durante os meses de decembro e xaneiro deste ano estivéronse preparando os terreos, a metade dos cales está en alta pendente e a outra metade, en baixa, co fin de realizar a prantación esta semana.

A ONG contribúe co proxecto a acadar os Obxectivos de Desenvolvemento Sostible da Axenda 2030. A iniciativa relizouse en convenio coa Comunidade de Montes e en colaboración co Concello de Monterrei, e contou co apoio do Ministerio para la Transcición Ecológica y el Reto Demográfico.

Voluntariado

Mañá Cruz Vermella Ourense levará a cabo en Guimarei unha acción de concienciación con voluntarios que axudarán a prantar algunhas das árbores escollidas, como piñeiros do país, sobreiros, aciñeiras, castiñeiros ou carballos negros, entre outras especies.

A reforestación, de tipo mosaico, busca aumentar e mellorar a biodiversidade, tendo en conta os froitos dos que se alimenta a fauna silvestre, así como a pendente e o substrato do solo.