Ruta conmemorativa entre o Castelo de Monterrei e a igrexa de Mixós

Día Internacional dos Monumentos e Sitios

Turismo Monterrei organiza o venres 18 de abril unha ruta para conmemorar a declaración do castelo de Monterrei e da igrexa de Santa María de Mixós como monumentos histórico-artísticos

Exterior da igrexa de Santa María de Mixós, un templo prerrománico no núcleo homónimo do concello de Monterrei. | La Región

A acrópole de Monterrei e a igrexa de Santa María de Mixós, dous dos principais monumentos histórico-artísticos do concello de Monterrei, uniranse nunha nova ruta o vindeiro 18 de abril, venres, en conmemoración do día internacional dos Monumentos e Sitios.

A oficina de Turismo Monterrei propón para ese día un percorrido guiado circular, de arredor de seis quilómetros, co fin de pór en valor ambos monumentos, bens de interese cultural e declarados histórico-artísticos en 1931, xunto coa Catedral de Ourense, o Mosteiro de Celanova, entre outros.

A actividade é totalmente de balde, e partirá ás 11,00 horas dende o cruceiro situado na entrada da Fortaleza. Ao longo da ruta seguirase unha parte do Camiño Mozárabe ata chegar á igrexa de Santa María de Mixós, onde se visitará o interior deste templo prerrománico do século IX.