Mercadiño solidario en Porqueirós, Muíños, para axudar a animais da rúa

O campo da feira de Porqueirós, en Muíños, albergará este Sábado Santo un mercadiño solidario para recadar fondos para os cans e gatos da rúa, esterelizalos e coidar das colonias felinas.

Tamén se recollerán alimentos para os animais, como piensos e comida húmeda, e doazóns doutros produtos. Os voluntarios darán información sobre a lei de benestar animal e concienciarán sobre boas prácticas coas mascotas.

O mercado ofrecerá produtos de segunda man cedidos por veciños de Lobios e Muíños, con artigos de decoración, prantas, prendas de vestir, roupa de nenos, cadros, artesanía, libros, discos, calzado ou bisutería a prezos económicos.

Tamén haberá pulpo do Pucho de Xinzo de Limia e máis churrasco, así como un photocall rústico para tódalas persoas que se acheguen, e un burriño que fará as delicias da cativada e amosará a este animal a todos os que se acheguen.

Horario

O horario será de 12,00 a 20,00 horas, e en caso de chuvia trasladarase á antiga escola de Porqueirós. Organizan a Asociación de Veciños de Porqueirós e a Asociación de Augas “Virxe da Aparecida”, e colabora o Concello de Muíños, así como diversos negocios, asociacións e empresas da comarca.