Miguel Anxo Fernán Vello obtén o VI Premio de Poesía Florencio Delgado Gurriarán

Valdeorras viviu este sábado unha velada chea de poesía da man da Fundación Florencio Delgado Gurriarán. O teatro Lauro Olmo do Barco acolleu onte unha gala benéfica que culminou coa entrega da sexta edición do Premio de Poesía Florencio Delgado Gurriarán a Miguel Anxo Fernán Vello polo seu poema “A porta da casa que se abre”

O poeta, dramaturgo, pintor e editor, nado en Cospeito en 1958, recolleu o galardón, dotado con 3.000 euros, despois de ser escollido polo xurado pola súa “profundidade, capacidade lírica e imaxes que espertan a sensibilidade do lector”. Os outros finalistas foron os poemas “A Casa de barro”, de Cristina Ferreiro, e “Deixará de pasar algún día”, de Saray Rodríguez Pérez.

A poesía foi o fío condutor dunha gala que por vez primeira cobrou entrada para destinar a recadación a proxectos de restauración da flora e fauna nos montes valdeorreses afectados polos lumes forestais deste verán. O evento estivo conducido pola actriz Iria Pinheiro, acompañada en escena polo músico e artista Davide González.

Encontro en Petín

A praza Doutor Quiroga de Petín acollerá este domingo, ás 12,30 horas, un encontro poético-musical ao que acudirán os finalistas e xurado do Premio, e no que terá a súa estrea Nadel, unha nova asociación cultural valdeorresa que aposta por “sementar futuro en galego”.

A súa proposta en Petín é “poesía frigorífica”, imáns con versos dos poetas do Premio que a xente poderá levar unha vez superados algúns xogos relacionados cos autores da comarca. Ás 13,00 horas dará un concerto o grupo quirogués Mario Colomán & The Clocks Band.