O barrio de Flores convértese nun cine ó aire libre por tres noites

O barrio de Flores volverá converterse este verán nun espazo de encontro arredor do mellor cine galego e internacional grazas á celebración dunha nova edición de “Flores de Cine”, un ciclo que conta unha vez máis coa colaboración da Filmoteca de Galicia e co apoio do Concello do Carballiño.

Durante tres noites consecutivas da vindeira semana, os días 15, 16 e 17 de xullo, ás 22,30 horas, a veciñanza poderá gozar de cine ao aire libre, ao carón da Bodega do Barrio de Flores, nunha cita xa consolidada na axenda cultural do verán carballiñés. A entrada é libre ata completar aforo.

A programación deste ano arrinca o martes 15 coa proxección de “Tralas luces”, de Sandra Sánchez. O filme mergúllase na vida de Lourdes, unha muller que percorre Galicia de feira en feira co seu negocio de coches de choque, ofrecendo unha ollada íntima e elegante sobre o oficio e a vida itinerante.

O mércores 16 será a quenda de “Rock Bottom”, cinta de animación inspirada na figura do músico británico Robert Wyatt, fundador da banda Soft Machine. O filme, nominado aos Premios Goya, destaca pola súa coidada estética e polo seu profundo amor pola música.

O xoves 17, pechará o ciclo a proxección de “La marsellesa de los borrachos”, de Pablo Gil, unha obra estreada en 2024 que recupera unha viaxe de antropólogos italianos en 1961 para recompilar cancións populares antifranquistas.