Catro empresas optan a reformar a estrada de Arnoia

La Consellería de Infraestruturas e Mobilidade recibiu catro ofertas de empresas para executar as obras da primeira fase de mellora da estrada OU-402, no Concello da Arnoia, que suporán un investimento autonómico de 810.000 euros. Trátase de actuar nun treito de preto de 1,6 kilómetros desta vía autonómica, que actualmente carece de beirarrúas, beiravías e zona para peóns.

A Xunta prevé iniciar estas obras no outono, co obxectivo de telas rematadas na primavera do 2023, xa que os traballos teñen un prazo de execución de 6 meses. As obras incluirán a mellora do trazado da vía, ampliando, sempre que sexa factible, a estrada ata os 7 metros de ancho. Tamén se rectificarán as curvas de radio reducido; habilitarase un espazo peonil, construíndo beiravías ao longo de algo máis de 1 kilómetro, de 2 metros de ancho, pola marxe esquerda, e cuneta transitable ao longo de medio quilómetro.

Tamén se mellorará a senda existente entre o acceso ao balneario e o núcleo de Arnoia e contorna, e habilitarase un carril central de espera e un cambio de sentido.

Tendo en conta que se intervirá tamén na entrada ao núcleo urbano, adecuarase o trazado á normativa vixente, incidindo sobre a mellora da visibilidade na circulación. Neses 600 metros, debido á dificultade de ampliar a vía sen afectar ás edificacións existentes, conservarase o ancho actual dos carrís, 3 metros, actuando na gabia da marxe esquerda, para convertela en transitable. A intervención completarase con traballos de reforzo do firme, mellora da drenaxe, sinalización e instalación de barreiras de seguridade.