O Consello da Xunta declarou a área Rexurbe de Ribadavia

O Consello da Xunta declarou a área Rexurbe de Ribadavia a través da cal se realizarán actuacións públicas e privadas dirixidas á mellora dos inmobles existentes e dos espazos públicos xunto con medidas sociais, ambientais e económicas co obxectivo de mellora das condicións de vida, a creación de riqueza e postos de traballo e a dinamización demográfica.

A área Rexurbe de Ribadavia incluirá todo o ámbito do conxunto histórico da vila, que tamén conta coa área de rehabilitación integral (ARI). A superficie total da área é de 0,108 quilómetros cadrados e existen nela, segundo a memoria presentada polo concello, 459 edificios cun total de 709 vivendas. Dese total, 263 edificios atópanse en estado deficiente, malo ou ruinoso.

A través desta nova figura, o Concello de Ribadavia pretende realizar actuacións de rehabilitación e mellora de edificacións e trama urbana que incidirán sobre a situación económica e social dos ámbitos da área Rexurbe e de toda a vila de Ribadavia.

Unha vez realizada a declaración, o concello deberá redactar un plan de dinamización da mesma, na que se indiquen as medidas para adoptar e actuacións que se deben levar a cabo, o custe estimado das mesmas e as fontes de financiamento, público e privado.

Dentro do Rexurbe o Instituto Galego da Vivenda e Solo pretende adquirir este ano inmobles para rehabilitar, destinando a tal fin 200.000 euros.