A Festa da Istoria estrea un campo de voluntariado en Ribadavia

O Concello de Ribadavia é sede do campo de voluntariado “Viaxa pola Istoria”, unha actividade que forma parte dos campos de voluntariado do programa acción de verán que organiza a Dirección Xeral de Xuventude da Xunta de Galicia. Entres os seus obxectivos está apoiar o proceso de organización dunha Festa de Interese Turístico Nacional, como é a Festa da Istoria.

Os traballos que desenvolverán os participantes poden clasificarse en dúas áreas de actuación: por unha banda, preparación dos elementos ornamentais da caracterización para a Festa da Istoria, centrándose na restauración de material que se atopa desfasado ou deteriorado, así como a ampliación de recursos que sexan solicitados (nova cartelería, material para as animacións…). E por outra banda, tamén levarán a cabo a elaboración de recursos turísticos para a dinamización da vila máis alá da festa.

Así, desenvolverase un evento de rol en vivo, no que as persoas voluntarias do campo de voluntariado deseñarán unha trama que despois interpretarán interactuando directamente con participantes locais que se unan á actividade.

Os mozos, que estarán en Ribadavia entre o 1 e o 12 de xullo, foron recibidos polo alcalde, César Fernández, quen lles agradeceu que escolleran a vila para vivir a experiencia única, na que coñecerán o importante dinamismo cultural e social deste Concello.