Julio Dabarca expón o seu belén dedicado ao Ribeiro

Julio Dabarca inaugura o Nadal de Ribadavia co seu singular e artístico belén, convertido en icona local desta festa. Dende este pasado xoves pódense visitar e ollar as figuras que se repiten doutros anos e as 19 personaxes e 6 “casetas” novas creadas para esta edición, con representacións de oficios e personaxes do Ribeiro.

De tallar ataúdes, Julio Dabarca, veciño de Francelos, pasou a tallar figuras de Nadal no ano 2001, primeiramente empregando madeira de cerdeira e, na actualidade, de castiñeiro. “Vou facendo pezas distintas porque a xente quere ver algo diferente. Nun día podo chegar a facer unha figura, leva tempo porque hai que primeiro cortalas, despois tallalas e por último, pintalas”, explica o autor. As Mulleres Rurais axudan todos os anos na montaxe, que conta tamén coa colaboración da parroquia, acollendo o Belén na Igrexa de Santiago.