O museo rural exhibe a súa forza en Ribadavia

O Museo do Viño de Galicia, ubicado en Santo André de Camporredondo, no municipio de Ribadavia, acolleu onte a xornada técnica de museos organizada pola Xunta de Galicia: “ Museos en ámbitos rurais e vilegos”.

Este ano, a xornada estivo dedicada aos museos que teñen a súa sede no rural, en vilas ou pequenas cidades cómo é o propio caso do museo que este ano foi anfitrión. Desta maneira, os conferenciantes compartiron as súas experiencias nos museos onde traballan, nunha xornada onde aprender, compartir e reflexionar sobre a práctica profesional no mundo dos museos.

O director xeral de Cultura, Anxo Lorenzo, foi o encargado da inauguración, dando paso ao longo do día ás intervencións de un total de nove profesionais de distintas procedencias e con experiencias diferenciadas: Fernando Seara, director do Museo do Douro; Covadonga López, do Museo Massó; Juan Seara, do Conxunto Museístico de Allariz; Elena Varela, directora do Centro de Viladonga e do Conxunto Etnográfico das Pallozas do Cebreiro; José Antonio Quiroga, director do Ecomuseo Pazo; Cecilia Doporto, encargada do Museo Ramón María Aller Ulloa; Marcos Vázquez, representando a Colección Museográfica Viva e Integrada do Campo e Locomoción Agraria (Muvicla); María Rocío Acha, responsable do Museo Etnográfico e do Viño de Cambados, e Xoán Xosé Molina, presidente do Padroado do Museo Comarcal de Fonsagrada.

Os asistentes participaron nunha posta en común e realizaron unha visita guiada polas instalacións de Santo André de Camporredondo, onde se abordaron entre outros temas a diversidade na xestión destes museos, que contribúen á dinamización cultural do lugar onde están ubicados, ao coñecemento da contorna e atenden ás novas demandas dun turismo sostible de fin de semana, segundo sinalan os organizadores da xornada.