Piden outra xestión da aula teatral de Ribadavia

Ribeiro en Común vén de presentar unha moción na que insta ao Concello a sacar a concurso público a dirección da aula municipal de teatro.

Piden que se adopten medidas “para que volva á súa proxección de mellora e aumento de calidade”, xa que consideran que “a mala xestión do alcalde e da concelleira de cultura levaron a perder case o 70 % do alumnado, pasando de 75 alumnos a só 25, debido a decisión unilateral do goberno municipal de prescindir da iniciadora da aula e última directora”.

Por outra banda, consideran que o anuncio da convocatoria dun concurso público para seleccionar ao novo director da Mostra Internacional de Teatro “chega tarde, pois o goberno deixou pasar 6 meses sen preocuparse por un dos principais eventos de Ribadavia”.

Ribeiro en Común critica a falla de diálogo cos grupos municipais e co director saínte, Roberto Pascual. “Todo parece indicar que o goberno ten algún “tapado”, ou que está improvisando e banalizando cun evento tan importante para Ribadavia”, sinalan.