O PP critica a falta de axudas contra as velutinas en Melón

Ante o acontecido o pasado fin de semana en Melón, onde un home perdeu a vida como consecuencia de picaduras de velutina, o Partido Popular de Melón pide ao grupo de goberno que renda contas do traballo feito para a loita contra esta avespa.

Alberto Pardellas, portavoz dos populares locais, pediu mediante un escrito no Concello que o grupo socialista amose os escritos “remitidos a calquera servizo autonómico ou outro para solicitar axuda para eliminar os niños das velutinas”, así como “informar aos veciños nas oficinas municipais do concello”, anota Pardellas. O portavoz do Partido Popular tamén solicita ao grupo de goberno información “se houbera algunha reunión ou chamada telefónica con algún director xeral, conselleiro ou delegado da Xunta en Ourense”.

Declaracións do alcalde

Esta solicitude de información vén motivada polas explicacións que Emilio Díaz, alcalde de Melón, deu nas “redes sociais e nos medios de comunicación este fin de semana despois da traxedia vivida no concello de Melón por a picadura de velutinas”, engadiu o popular. Pardellas asegura que “o señor alcalde estaba avisado do perigo existente, porque varios veciños así o fixeron saber nas oficinas municipais durante varias semanas dos últimos meses”.

Por iso, o Partido Popular de Melón pide ao grupo de goberno que dean conta do traballo realizado nesta materia ante a invasión das avespas velutinas.