A presidencia da Mancomunidade do Ribeiro licita o segundo camión de lixo

A Mancomunidade do Ribeiro, ó traverso do seu presidente, Francisco José Fernández, vén de aprobar o procedemento aberto para a adquisición dun segundo camión destinado ó servizo de recollida de lixo, tra-la licitación dun primeiro días atrás. Nesta ocasión, o vehículo deberá contar cun dispositivo multibasculante e autocargante, e o seu custe é de 56.000 euros, con IVE e matriculación incluídos.

Deste xeito, a institución que agrupa na comarca do Ribeiro ós municipios de Beade, Leiro, Cenlle, Cortegada e Arnoia, reforzará o parque de vehículos para o devandito servizo. Con anterioridade, a Mancomunidade xa anunciou a compra dun camión compactador de residuos sólidos urbanos, cunha capacidade de 12.000 litros e que suporá un investimento de 137.000 euros.