O baile tradicional brilla no auditorio de Ourense

Con ilusión, esforzo e compromiso por poñer en valor o patrimonio cultural galego, a coral De Ruada celebrou onte o seu primeiro concurso de baile tradicional, no auditorio municipal. Alí reuníronse un total de 26 grupos pertencentes a asociacións folclóricas, recreativas, agrupacións xuvenís, culturais, de veciños e centros parroquiais. En total, foron 450 participantes que estiveron divididos en catro categorías por idades, co obxectivo de favorecer a participación interxeracional e o relevo cultural, para asegurar manter vivas as raíces. “A categoría con maior participación foi a dos nenos, isto é unha boa experiencia para eles, unha forma de socializar á vez que viven a cultura”, sinala Ismael Rodríguez, responsable da organización deste certame.

Esta iniciativa, moi agardada polos amantes da tradición, tivo unha gran acollida tanto en número de participantes como de asistentes. O auditorio rexistrou un “cheo absoluto”, mentres que os grupos que se animaron a concursar desprazáronse dende distintos puntos de toda Galicia. Con todo, a idea é seguir abrindo fronteiras. “Houbo grupos de asociacións galegas de Madrid e outros lugares que querían anotarse”, sinala Rodríguez, que xa mira con grandes expectativas a próxima edición.

Neste ano 2025, no que o Día das Letras Galegas estivo dedicado ás cantareiras e á poesía popular oral, a coral De Ruada quixo sumarse á celebración cunha actuación moi especial, a das Pandeireteiras de Zobra.