Bernardino Garrido, alertado polos constantes incendios de A Lonia: “Non puiden durmir nada en toda a noite”

TRES DÍAS CONSECUTIVOS

Tres días consecutivos de incendios, poñen en alerta aos veciños da zona rural de A Lonia, Ourense, tras afectar xa a fincas particulares e ameazar de cerca a casas. O deste venres puxo en perigo a vivenda dunha octoxenaria, que quedou rodeada polo lume.

Bernardino Garrido teme polos incendios de A Lonia, en Ourense

A veciñanza de Canibelos (A Lonia, Ourense) están atemorizada ante os continuos incendios que ameazan casas e fincas particulares. Este venres rexistrouse o terceiro en tres días consecutivos e o lume achégase cada vez máis ás vivendas. Coinciden, con preocupación, en que teñen que ser provocados.

Un dos veciños da zona detectou o inicio do lume entre dúa casas en torno ás oito da tarde, polo que chamou de inmediato aos servicios de extinción, que chegaron rápido á zona e evitaron males maiores. “O que sorprende é que entre as casas non había nada, os brigadistas estiveron toda a mañá, ata as catro da tarde, botando auga”, manifestou.

Segundo residentes de Canibelos, dende o ano 2018 é habitual que case todos os anos teñan lugar incedios que se aproximan as casas. “Este ano adiantáronse, normalmente son en agosto”, indican os veciños.

A finca de Flora, calcinada

Ao carón da casa de Flora Ríos comezou o incendio, o que provocou que a súa propiedade fose unha das máis ameazadas polas chamas. A súa finca, pegada á vivenda, quedou calcinada, tras prender nun montón de ramas, pero non chegou a afectar á casa, pese á gran proximidade.

Tamén afectou, en menor medida e cercanía, a unha eira situada no outro lado da vivenda, que chegou a estar rodeada polas lapas, excepto pola parte de abaixo.

Salvouse pola rápida actuación dos bombeiros e a chegada de helicópteros e avións, e ademais ao cambio de rumbo do vento. “Ao principio facía moito cara a casa e despois cambiou de dirección, levando o lume monte arriba”, explicou a propietaria, sorprendida polo inicio do lume, pese que a finca e o camiño estaban desbrozados e limpos. “Empezou a arder antes a finca que o monte”.

“Agora xa te metes na cama con temor por se arderá ou non”, expresou Flora Ríos. A veciñanza vive atemorizada ante a posibilidade de que se produzan novos lumes que afecten á integridade das súas propiedades e a súa misma.

Bernardino Garrido, veciño da zona, asegura que “non puiden durmir nada en toda a noite”, ante o medo polo último incendio.