O Campus ten completos o 75% dos graos ofertados

O Campus de Ourense marchou de vacacións con parte dos seus deberes feitos. Tras cinco chamamentos de matrícula para novos alumnos, a cifra de graos que colgaron o cartel de “completo” ascende a 18. Entre os estudantes que formalizaron a súa inscrición atópanse tanto os que realizaron a Proba de Acceso á Universidade na convocatoria ordinaria, como os que tiveron que facelo na extraordinaria.

Un ano máis Enxeñería Aeroespacial marcou a nota máis alta, cun 12,376, seguido do PARS de Aeronáutica -grao de Aeroespacial + máster de Aeronáutica-, con 12,336. A terceira nota máis elevada é a do grao en Relacións Internacionais (11,458), que sobe o resultado respecto ao curso anterior.

Opcións dispoñibles

Un total de seis graos aínda ofrecen prazas para aqueles estudantes que aínda non decidiron o seu futuro. En caso de decantarse polo Campus de Ourense, poderán matricularse no grao de Ciencia e Tecnoloxía dos alimentos, Ciencias Ambientais, Enxeñería Agraria, Turismo e as simultaneidades de Turismo e Xeografía e Historia ou Enxeñería Agraria e Ciencias Ambientais.

O 3 de setembro realizarase o seguinte chamamento de matrícula. Será o día 8 dese mesmo mes cando se de inicio a un novo curso académico. Con todo, no caso de que se produzan vacantes nalgunha titulación pechada, a Comisión interuniversitaria de Galicia (CiUG) convocará ao alumnado que lle corresponda segundo as listaxes elaboradas a partir das notas obtidas nas probas de acceso, para que, en caso de desexalo, poidan realizar un cambio de estudos.