O OUFF propón un enfoque social na inauguración do seu 30 aniversario

Luces, cámara e… acción! A 30ª edición do Ourense Film Festival (OUFF) empezou onte a súa rodaxe particular. Un Auditorio Municipal ateigado de asistentes actuou como telón de fondo dunha gala de inauguración que combinou emoción, humor, música e reivindicación cultural.

Á última hora da tarde, a alfombra verde despregouse para recibir a caras recoñecidas do panorama audiovisual e tamén da cidade. Ninguén quixo perder a oportunidade de desfrutar dunha tarde-noite máxica. Xa nas butacas, a gala comezou cunha cálida benvida por parte dos condutores, que alternaron galego e castelán nun diálogo áxil e cómplice. Ruth Gabriel, gañadora do Goya á Mellor Actriz Revelación polo filme “Días contados”, expresou o seu entusiasmo por participar nesta edición tan especial, mentres que Iván Iglesias reivindicou o papel pioneiro do OUFF como primeiro certame internacional competitivo de Galicia.

Ruth Gabriel, gañadora do Goya á Mellor Actriz Revelación polo filme “Días contados”, presentou a gala

Non houbo tarta de cumpreanos para festexar os 30 anos de audiovisual, pero os desexos quedaron claros: seguir crecendo para poder consolidarse como cita de referencia internacional.

Óscar Doviso expresou a súa honra por asumir por primeira vez a dirección artística do OUFF, destacando que esta 30ª edición chega como “un soño feito realidade”. “O OUFF aposta polo cinema, por ser unha ferramenta de reflexión, que mira cara a sociedade e non só cara á pantalla”, destacou Doviso, que aproveitando a mirada social do festival quixo facer mención á necesidade de rematar co xenocidio de Gaza.

Recoñecementos de honra

O primeiro momento destacado da noite chegou coa entrega do Premio Chano Piñeiro. O elixido este ano foi o compositor galego José Manuel Cancela, gañador de cinco Emmys e autor da banda sonora oficial desta edición. Recibiu o galardón da man de John Axiom, músico e DJ ourensán que realizará unha versión remix do tema que se fixo para o OUFF. Durante a gala, o público puido escoitar un adianto deste OUFF Theme, que será interpretado na súa totalidade o domingo pola Xove Orquestra Ourensanía nunha posta en escena memorable.

Durante a Gala entregáronse os premios do festival a Javier Veiga, Charo Pena e José Manuel Cancela

O segundo galardón de onte foi o Premio Honorífico de AISGE, que recoñece a traxectoria de intérpretes galegos e que foi entregado pola delegada da Fundación en Galicia, Isabel Blanco. Charo Pena subiu ó escenario emocionada a recoller este premio que honra a súa traxectoria como actriz e directora de dobraxe.

Gran parte dos asistentes quedaron abraiados ao descubrir que a galardoada era a que facía a voz da nai de Shin Chan ou Meryl Streep, entre unha longa lista de iconos audiovisuais falasen tamén en galego. “Manter vivo o idioma” é a razón de ser de Charo Pena. “Aprendín que a dobraxe posibilita que se poidan escoitar en galego todas as historias”, sinalou.

A música tomou o escenario da man de Bebe e Pablo Novoa, que ofreceron unha actuación sorpresa que puxo o broche artístico á cerimonia. A gala deu paso ao visionado de “Playa de Lobos”, de Javier Veiga, a primera das 164 proxeccións incluidas na programación do OUFF, entre as que destacan esteras mundiais, cinema galego de primeiro nivel e películas con toque social.

“Hai un toque da terriña na obra para recordar as miñas raíces”

“Se hai futuro para o idioma, haberá futuro para a dobraxe”

“Creo que o humor é unha maneira de chegar ao público”