Premio á “excelencia constante” para un enxeñeiro ourensán

O enxeñeiro informático ourensán e secretario do Colexio Profesional de Enxeñaría en Informática de Galicia (CPEIG), Juan José González Cid, foi premiado nos “Premios á Excelencia e Compromiso Profesional 2025” da Unión Profesional de Galicia (UPG).

O CPEIG decidiu propolo para este galardón por representar a “excelencia calada e constante”, xa que como secretario desde 2011, traballa cunha dedicación exemplar, sempre desde a discreción, cun carácter próximo e colaborador. “O seu compromiso co servizo público, a inclusión social e o impulso de proxectos como Navega con Rumbo ou o premio e-Inclusión da gala da noite que organiza anualmente o Colexio de Enxeñaría Informática, reflicten a súa vocación por mellorar a vida das persoas a través da tecnoloxía. É, sen dúbida, merecedor deste recoñecemento polo seu labor incansable, a súa xenerosidade e a súa humanidade”, manifesta o CPEIG.

González Cid vive a caballo entre a capital das Burgas e Santiago, é enxeñeiro en informática pola Universidade de Vigo e Máster en Dirección de Proxectos con especialización en Seguridade Informática. Actualmente traballa no ámbito TIC do Ministerio para la Transición Ecológica. Foi recoñecido pola Agencia Española de Protección de Datos (AEPD) e a Seguridade Social polo seu labor en ciberseguridade e inclusión dixital.