A Universidade rende homenaxe a labor das lavandeiras

A Universidade de Vigo celebra un ano máis o 8 de marzo, Dia Internacional da Muller, uníndose ás reivindicacións dunha sociedade na que homes e mulleres vivan en pé de igualdade. Neste senso, entregará hoxe nun acto institucional no Campus o premio ao compromiso coa igualdade de xénero na UVigo, Uviguala.

Ademais, este ano realiza unha campaña institucional na que renderá unha homenaxe ao traballo das mulleres a partir da figura das lavandeiras. Así, a súa imaxe gráfica recolle unha obra da artista e egresada da Facultade de Belas Artes do campus de Pontevedra Xoana Abraira de Bernardo, presentada no seu traballo fin de grao “O oficio de lavar”.

Desde a Unidade de Igualdade da UVigo sinalan que neste 8 de marzo queren recoñecer o papel das mulleres traballadoras que rompen cos estereotipos de xénero a través da figura das lavandeiras. As lavandeiras, subliñan, “desenvolveron un traballo que requiría de gran fortaleza física, xa que non só pasaban longas xornadas na auga fría enxaboando, fregando e clareando a roupa, senón que cargaban con ata 30 quilos de roupa mollada para facer o seu traballo”. 

Neste senso, inciden en que tamén exercían como costureiras, pasadoras de ferro e tecedoras. “Os lavadoiros tiveron un papel importante como espazos de sociabilidade feminina e o oficio sería unha das ocupacións principais das mulleres das clases populares, como traballo remunerado e como tarefa cotiá para a reprodución da vida. Elas foron, e son, figuras de memoria e acción”, subliñan desde a Unidade de Igualdade. Ademais, na súa campaña fan un percorrido histórico polo legado das mulleres na vida económica das súas comunidades.