A Xunta inicia as obras na rúa ourensana Emilia Pardo Bazán

As máquinas comezaron a traballar o xoves nunha das arterias fundamentais da cidade, a rúa Emilia Pardo Bazán. Trátase dunha actuación longamente demandada polos veciños da zona e que executa a Xunta ao tratarse dun viario de titularidade autonómica. O delegado territorial da Xunta en Ourense, Manuel Pardo, supervisou sobre o terreo o inicio duns traballos executados por Extraco que buscan renovar a seguridade e a accesibilidade da vía, acompañado por técnicos da Axencia Galega de Infraestruturas.

A intervención en Emilia Pardo Bazán non é un feito illado, senón que forma parte dun paquete de melloras que a Consellería de Vivenda e Planificación de Infraestruturas está a despregar na capital. En total, o Goberno galego inviste máis de 2,8 millóns de euros para acondicionar 13 travesías urbanas da súa competencia. Segundo detallou Manuel Pardo, as obras céntranse na reparación e reforzo do firme da calzada e na rehabilitación das beirarrúas, ademais de incluír a renovación completa da sinalización horizontal e melloras na drenaxe onde sexa necesario.

O plan, deseñado para reforzar a seguridade viaria e a comodidade dos usuarios, esténdese por diversos puntos estratéxicos da cidade. Ademais da citada Emilia Pardo Bazán, as actuacións beneficiarán ás rúas Río Arnoia, Progreso, parte da rúa Velázquez, Bispo Lorenzo, Coruña, Pena Trevinca, Seminario, Sáenz Díez, Bos Aires, Isaac Piñeiro Varela e Pena do Vado, rúa de Ponferrada e a Avenida de Zamora. O obxectivo é garantir unha axeitada conservación destas infraestruturas, preparándoas tamén ante eventos climáticos extremos e asegurando a vertebración territorial complementaria á rede estatal.

Estas obras súmanse ás intervencións recentes executadas na cidade, como as melloras na rúa Progreso e Avenida de Zamora durante este mesmo ano, ou as grandes reformas integrais xa finalizadas en Marcelo Macías, Otero Pedrayo e Seixalbo.