O proxecto Ruralmente achégase a Porqueira

O proxecto “Ruralmente” chega á comarca da Limia o vindeiro martes 26, cun curso sobre a produción da pataca baixo a IXP Patacca de Galicia, que terá lugar na Casa do Concello de Porqueira a partir das 9,30 horas.

“Ruralmente” ten por obxectivo o intercambio de coñecementos e a innovación entre as diferentes rexións que participan nel, neste caso, grazas ó GDR Limia-Arnoia que forma parte do proxecto. Para acadar esta meta, os integrantes do proxecto organizan diversos eventos en formato de xornadas técnicas, seminarios e visitas de campo.

En concreto, o GDR Limia-Arnoia centra os seus esforzos en incrementar a produción e o número de entidades produtoras dentro da IXP Pataca de Galicia.

O curso dará comezo cunha conferencia da man de Luis Saa Arias, Director Técnico da IXP Pataca de Galicia, e que abordará a certificación e o control da pataca, amparada pola IXP Pataca de Galicia. José Antonio Chao, téccnico de promoción da IXP Pataca de Galicia ofrecerá unha charla sobre a comercialización e promoción da pataca de Galicia.

Laura Meno Fariñas, Doutora en Enxeñería Agraria, será a poñente da conferencia sobre avances científicos na xestión sostible de enfermidades da pataca, e pola súa banda, Servando Álvarez Pousa, Director do Centro de Desenvolvemento Agrogandeiro, dará a charla: “Cava fondo e bota basura”, os activadores do solo, fertilización en pataca.

Logo, haberá unha mesa redonda e unha degustación de pratos con pataca da Limia, preparada polo bar O Muíño. A xornada rematará cunha visita á explotación de Julio Montero en Porqueira.

Dende o GDR Limia-Arnoia explican que Ruralmente “ten sentido porque queremos demostrar que a vida e as profesións do rural teñen moita dignidade”.