O GDR Limia-Arnoia serve de guía ao Camiño Mozárabe

O GDR Limia-Arnoia deu cita a uns vinte representantes de institucións pertencentes á Asociación de Municipios del Camino Mozárabe de Santiago para participar nunha viaxe técnica ao Camiño Portugués.

O “Intercambio de experiencias en xestión e promoción do Camiño de Santiago”, ten como obxectivo “extraer aprendizaxes e boas prácticas aplicables” ao desenvolvemento e consolidación do Camiño Mozárabe en Andalucía, “fortalecendo a cooperación e o intercambio de coñecementos” entre entidades locais, segundo apuntan dende o GDR.

Os participantes achegáronse ao Ecoespazo O Rexo, “un espazo agroecolóxico e artístico no que se mistura paisaxe, gandería e cultura”, ademais de visitar a Casa do Concello de Allariz, onde a alcaldesa, Cristina Cid, e a concelleira de Turismo, María López, presentaron o modelo de xestión municipal, que aposta pola recuperación do casco histórico, a dinamización do comercio local e a integración dos museos.

Este martes pola tarde, os alcaldes e representantes institucionais participantes do proxecto visitaron o concello de Xinzo, onde aprenderon sobre a transformación territorial da comarca e visitaron a Torre da Pena.