Sabela Mendoza, elixida como a directora da MIT de Ribadavia

A Mostra Internacional de Teatro de Ribadavia (MIT) abre unha nova etapa co nomeamento de Sabela Mendoza Fernández como directora artística, tras obter a maior puntuación no proceso de licitación convocado polo Concello de Ribadavia. Mendoza, cunha ampla traxectoria na xestión cultural e nas artes escénicas contemporáneas, será a encargada de definir a liña artística do festival, consolidando o seu prestixio a nivel galego, estatal e internacional.

O alcalde de Ribadavia, César Fernández, destacou “o inicio dunha nova etapa para a MIT, cunha profesional de gran prestixio e ampla experiencia como directora artística, o que garante a continuidade da excelencia e a innovación que caracterizan este festival.”

A chegada de Mendoza prodúcese tras a saída de Roberto Pascual, director durante 15 anos, que collera o relevo de Rubén García, impulsor da Mostra.

Ampla traxectoria

Sabela Mendoza, nada en Santiago de Compostela en 1984, é unha recoñecida investigadora, creadora e xestora cultural especializada en artes escénicas e performativas. Cunha formación multidisciplinar que inclúe a Licenciatura en Dereito, un Máster en Xestión Cultural e outro en Práctica Escénica e Cultura Visual, desenvolveu a súa carreira en diferentes proxectos de referencia a nivel nacional e internacional.

Traballou na coordinación de proxectos na Fundación Residencia de Estudiantes e na xestión de proxectos culturais no Matadero Madrid. Ademais, é fundadora da plataforma galega para as artes performativas contemporáneas ‘De corpos presentes’ e co-responsable do proxecto de mediación ‘Cara a unha escena plural’.

A nova directora salientou que a súa proposta “pretende continuar e expandir os valores da MIT e seguir afondando nas liñas programáticas habituais, ao tempo que sumar novas propostas e iniciativas, en especial de apoio á creación galega e de intercambio de actividades de participación cidadá”. Mendoza destaca o concepto de “Escenas en tránsito” que van “dunha linguaxe a outra, dun corpo a outro, dun territorio a outro” para consolidar a posición da MIT como espazo de referencia para a experimentación escénica.