“O Afiador”, candidato a mellor mural do mundo

O mural de “O Afiador”, elaborado polo artista urbano Mon Devane no concello de San Xoán de Río, é un dos 100 traballos seleccionados pola plataforma Street Art Cities para facerse co premio de mellor mural do mundo do mes de xullo e poder optar así ao galardón final, que se decidirá en xaneiro. o artista asegura estar “moi contento e moi orgulloso” de formar parte desta lista de obras seleccionadas. “É unha das plataformas máis importantes do mundo no que se refire a arte urbana”, explica.

A pintura é froito dun proxecto de varios murais, realizado co Concello en varios puntos da localidade. “Nesta parte, en Castiñeira, íamos retratar outra temática, pero Juan -o protagonista da obra- estivo contándome as súas historias como afiador e quixen homenaxealo”, conta Mon Devane. A votación para que sexa elixido o mellor mural está aberta, na web da plataforma, ata este domingo, 10 de agosto.