A renovación de Santa Ana, pendente de licitación inmediata

Máis de 30 veciños do pobo de Santa Ana acudiron a cita do alcalde do Concello de Sandiás, Felipe Traveso, e o concelleiro, Tito Traveso, na vivenda social “Escolas de Santa Ana” para unha reunión informativa sobre a próxima obra de rehabilitación do núcleo urbano da aldea de Santa Ana. 

As obras centraranse na entrada da aldea e no núcleo urbano e levaranse a cabo nunha única fase, a cal está pendente de pronta licitación. Farase unha renovación e soterración dos servizos urbanos da rede de baixa tensión, telecomunicacións e a rede de iluminación pública. Tamén se fará separación de augas pluviais e fecais e está proxectada a reposición dos pavimentos con formigón e lastra de pedra pola beira das casas. Nas airas non se fai intervención ó non ser bens de titularidade municipal, pero o alcalde xestionará coa empresa as acometidas privadas das casas que o demanden no concello. Tamén pretende xestionar coa Xunta de Montes a titularidade dos terreos ca finalidade de facer un parque.

Esta actuación está incluída no Plan Hurbe, unha colaboración da Xunta co ámbito local para axudar ós concellos a financiar actuacións que poidan recuperar espazos públicos ou mellorar equipamentos. A Xunta asume o 70% dos custes, que supón un investimento de 225.000 euros, ademais de contratar e executar as obras. Por outra banda, a Deputación achegará 70.000 euros e o Concello achegará 26.000 euros, ademais de redactar o proxecto e o mantemento e conservación da intervención.