Sandiás ofrece un espazo de diálogo entre mulleres

O Programa Rosalía organizou recentemente o obradoiro “Conversando sobre a nosa sexualidade” na Casa da Cultura de Sandiás, un encontro para falar de intimidade feminina a través das experiencias e dúbidas das participantes.

A actividade foi impartida pola enfermeira Beatriz Domínguez e contou coa presenza de varias mulleres da localidade, que abordaron cuestións relacionadas co autocoidado, a saúde, o benestar e o desexo feminino. A iniciativa creou un espazo de diálogo no que as asistentes puideron tratar estes temas e compartir as súas experiencias sobre eles e sen tabús.

Para todas

Aberta a mulleres de todas as idades, a sesión permitiu poñer en común diferentes maneiras de entender e vivir a sexualidade. O encontro tamén serviu para reflexionar sobre a importancia de contar con información para coñecer mellor estes aspectos e tomar decisións relacionadas co propio benestar.

Desde a organización destacan a súa vontade de manter este espazo aberto á veciñanza de Sandiás e dar continuidade a este tipo de propostas. O obxectivo é manter esta conversa arredor da saúde sexual a través de actividades coma esta, que favorezan a participación da comunidade e reivindiquen o tratamento destes temas desde unha perspectiva respectuosa e como unha responsabilidade compartida.