A auga da Limia tórnase vermella en Sarreaus

O “Prestige” da Limia é o nome que recibe o barco abandonado na explotación areeira que se atopa no Concello de Sarreaus, Feldespatos Sarreaus, enclavado na Lagoa de Antela. Este barco é un residuo dos traballos que cesaron hai máis dunha década tras a morte dun traballador.

O barco contiña preto de 5.000 litros de combustible no seu depósito, parcialmente afundido, e que segundo advertían os veciños e diferentes grupos políticos, era cuestión de tempo que acabaran na auga, e polo tanto, filtrándose ao acuífero da Limia xa que a capa inferior do charca é area “que non filtra nada”.

E así foi, onte pola tarde un veciño da zona notificou unha cor vermella intensa no corpo acuático no que se atopa esta embarcación, apuntando aos 5.000 litros de combustible -aínda sen confirmar-, dándolle aviso á Garda Civil que se achegou para facer o debido informe da situación.

A Xunta de Galicia informa que dende a Dirección Territorial da Consellería de Medio Ambiente e Cambio Climático en Ourense se desprazaron á zona axentes ambientais para facer o correspondente informe da situación “de cara a adoptar as decisións oportunas”, incidindo en que “darase traslado da acta á Confederación Hidrográfica Miño-Sil (CHMS), dependente do Goberno central, dado que a lagoa está dentro do seu ámbito de actuación e das súas competencias de xestión dos recursos hídricos”.

Ao peche desta edición, non se obtivo resposta da CHMS.

BNG

Pola súa banda, o Bloque Nacionalista Galego (BNG) levou esta situación ao Parlamento galego o pasado mes de agosto, cando denunciaban o grave deterioro ambiental debido á contaminación que leva producida esta embarcación ao longo do tempo e a falta de medidas efectivas para por fin ao verquido.

Onte o BNG volveu denunciar esta situación, e o portavoz na Deputación de Ourense, Bernardo Varela, advertiu desde a charca de Feldespatos que “se cumpriu o prognóstico que faciamos xa no mes de agosto”, ao observarse un cambio significativo na cor da auga que indica que o material contaminante do interior da embarcación está a liberarse ao medio de forma masiva.

“Descoñecemos de quen é a responsabilidade directa, pero alguén terá que asumila e tomar medidas de maneira inmediata”, subliñou Varela.

O portavoz provincial advertiu tamén de que non actuar supón deixar a resolución do problema “en mans da propia natureza”, unha opción que cualificou de inaceptable, e anunciou que o BNG volverá levar esta cuestión ás institucións galegas e ao Estado para que se determine quen ten a responsabilidade de actuar e se deteña de inmediato a vertedura.

O portavoz municipal do BNG en Sarreaus, Agustín Martínez, lembrou que esta situación foi advertida reiteradamente no Concello. “Avisouse unha e outra vez ao alcalde de que había que facer algo. Recoñeceuse o problema, pero non se fixo absolutamente nada, porque non facer nada é o traballo máis livián”, denunciou o portavoz.

Varela cualificou de “lamentable” que, tras dúas décadas de abandono do barco afundido, e despois de reiteradas advertencias do BNG a nivel local, provincial e autonómico, non se actuase a tempo para evitar esta situación.

“Agora falamos de actuacións moito máis custosas, tanto desde o punto de vista ambiental como económico, fronte ao que tería suposto intervir cando se alertou”.