Unha decena de grupos encheron Trasmiras de música e troula

A Escola de Música de Trasmiras vén de celebrar a segunda edición do Festival Lumeada, un evento que segundo explica o alcalde, Emilio Pazos, “busca promover e cultivar a tradición musical que tivemos sempre en Trasmiras”. Neste concello da Limia o gusto pola música vén de vello, segundo explica o alcalde, e durante moitos anos “case en cada casa había un músico e non queremos deixar morrer esta tradición”.

Por iso dende a Escola de Música comezaron a organizar esta xuntanza, que reúne a músicos que gustan de compartir unha xornada que non só promove a música, senón a convivencia, xa que “podes ver o avó, o pai e o fillo tocando xuntos”. Este evento é o remate da actividade de todo o ano da escola, que naceu grazas “as inquedanzas de tódolos nenos e nenas” que no seu día a formaron, explicou Pazos. “Para nós é un orgullo continuar con esta parte da nosa cultura”.

O evento comezou a media tarde, cando xa se comezaron a escoitar as primeiras notas e compases, e é que máis dunha decena de grupos asistiron a esta cita, polo que o tempo apremaba. Achegáronse grupos de toda a comarca e fóra dela. Non so grupos de musica instrumental, senón tamén grupos de música vocal participaron no evento. Segundo explicou Pazos, “o mellor é a foliada na que se mesturan os músicos entre eles”.