Os Bolechas, acompañados do seu inseparable Chispa, fan parada en Chandrexa de Queixa

A familia máis querida polos nenos galegos, os Bolechas, fixeron unha parada moi especial no pavillón multiusos de Celeiros, no concello de Chandrexa de Queixa. Carlos, Pili, Loli, Braulio, Sonia e Tatá, xunto co seu inseparable can Chispa, protagonizaron unha tarde chea de diversión para os máis pequenos, enchendo o recinto de risas e entusiasmo.

O evento, que comezou ás 17,00 horas deste xoves, foi organizado no marco do programa FalaRedes, unha iniciativa promovida para fomentar o uso da lingua galega no lecer infantil. Esta actividade foi posible grazas á colaboración conxunta entre os concellos de Chandrexa de Queixa e Manzaneda, que traballaron man a man para garantir o éxito desta xornada lúdica, solicitando esta actividade para os dous municipios.

Os nenos de Manzaneda desplazáronse ata o pavillón de Celeiros nun minibús, preparados para compartir coa veciñanza unha tarde inesquecible.

A actuación dos Bolechas foi o punto de partida, enchendo o espazo de música, xogos e historias que engancharon a cativos e maiores.

Despois do espectáculo, a festa continuou cunha tarde de inchables que fixo as delicias dos asistentes. Para rematar con broche de ouro, unha chocolatada compartida axudou a repoñer forzas e deixou un doce sabor de boca nesta celebración comunitaria.

Desde ambos concellos destacaron o éxito da convocatoria e agradeceron a participación de todas as familias, subliñando a importancia de actividades como esta para reforzar a convivencia entre os concellos veciños e promover o uso do galego entre as novas xeracións.

Os sorrisos dos pequenos foron a mellor mostra de que os Bolechas cumpriron unha vez máis a súa misión: facer felices aos cativos mentres reforzan o uso da lingua galega.