Montederramo mellora o firme de varios pobos

Montederramo continúa coa súa aposta polo desenvolvemento local, tal e como manifestou o seu alcalde, Óscar Diéguez, e segue avanzando na mellora das súas infraestruturas viarias.

Esta pasada semana rematou a obra que se estaba levando a cabo, de limpeza e mellora da estrada que une Vilariño Frío con Vigueira de Abaixo, mediante dobre rego asfáltico, tamén se contemplou o acondicionamento dos bordes da calzada.

Esta actuación, enmarcada dentro do Plan Marco da Xunta de Galicia para o ano 2024, supuxo un investimento de 46.000 euros, IVE incluído, e abarcou unha lonxitude aproximada de dous quilómetros de estrada.

Ademais desta “importante intervención” para o Concello, varias localidades de Montederramo tamén viron rematadas as súas obras de mellora e pavimentación nos últimos días. Entre eles, destaca o caso de Currás, onde o novo pavimento xa está totalmente rematado.

Estes traballos na rede viaria municipal, sinala Óscar Diéguez que non só melloran a conectividade entre núcleos de poboación, senón que contribúe á seguridade e comodidade de veciños e visitantes, demostrando o esforzo continuo do municipio por manter e modernizar as súas infraestruturas.