Dron | A aldea de Celavente énchese festexando a ruta dos fornos

A posta en valor dos fornos tradicionais e fontes de Celavente, no Bolo, é a principal proposta da Asociación Centro de Animación Rural da localidade, encargada de organizar esta Ruta dos Fornos, que xa vai pola súa décima terceira edición; e foi captada por un dron. As imaxes amosan, a vista de paxaro, como foi este roteiro tradicional.

Este ano, tralo parón da pandemia, voltaron á normalidade e ás rúas da pequena aldea, enchéronse de vida os preto de 5 kilómetros que percorren, parando en cada forno e finalizando na praza do pobo.

Ás 13,00 horas abría esta orixinal celebración o pregoeiro Juan Corzo, quen escribe os seus propios versos sobre Celavente, e seguidamente comezaba a ruta onde os participantes degustaron chourizos asados, orella de porco, xamón asado, empanadas e torta de roxóns ou crema de castañas, todo acompañado de viño e licores.

O Forno do Vidueiro, dos Hortos, Outeiro, do Fondo, do Campo, do Cima e Bodega da Capilla foron os sete fornos participantes na ruta que nesta exitosa edición colgou o cartel de cheo, coa totalidade das entradas vendidas, 800 de adulto e 50 de cativos entre 7 e 12 anos.