A fala valdeorresa contará co seu propio dicionario

Os valdeorreses din “muito” cando en Viana do Bolo falan de “muto”. É unha das diferencias entre ás dúas microsubáreas da área dialectal do oriente galego. Así o explicou a filóloga ruesa Noelia Estévez antes de presentar o traballo que en 2014 realizou no centro Ramón Piñeiro, por encargo do catedrático Xesús Ferro Ruibal para o seu proxecto de fraseoloxía galega. A estudosa comentounono Centro Cultural Avenida de A Rúa, no que se desenvolveu o encontro “A fala valdeorresa e do Bierzo”, que organizou a Fundación Florencio Delgado Gurriarán para anunciar unha plataforma en liña destinada a crear un dicionario de fala valdeorresa. O traballo de Noelia Estévez contempla 85 variedades fraseolóxicas de Petín, Vilamartín e A Rúa, sendo publicado no Caderno de Fraseoloxía número 16, de 2014.

Calquera valdeorrés que coñeza unha palabra que poida ser específica do léxico de Valdeorras poderá enviala á plataforma

No acto tamén estivo a investigadora da Universidade de Vigo e berciana Sara Rodríguez, autora do “Dicionario do Galego no Bierzo”, un traballo que contén 15.000 palabras, que foi editado en 2023 e que xa está esgotado. Antes do inicio do acto, comentou que o galego berciano “ten moita semellanza co galego valdeorrés”, pero tamén que a súa situación non é de todo boa, pois “na rúa fálano os maiores”. Se ben recoñece que nas aultas hai “rapaces que queren estudalo”, o feito de que teñan que asistir á aula no horario extraescolar o dificulta. En todo caso, mostrou a súa confianza en que non desaparecerá.

Na Rúa tamén estivo a concelleira de Cultura do Barco e unha das impulsoras da Fundación Florencio Delgado Gurriarán, Margarida Pizcueta, quen lembrou os comezos da aventura no ano 2016 e a consecución do Día das Letras Galegas para o poeta de Córgomo finado en 1987. “Hoxe presentamos a web á que calquera valdeorrés que coñeza unha palabra que poida ser específica do léxico de Valdeorras poderá enviala”, dixo. A web pode visitarse en “florenciodelgadogurriaran.gal”. A cita rematou nunha cova de Vilela.