A Rúa sobreleva á calor con viño, romanos e música

As altas temperaturas que asolan á provincia non son unha excepción na comarca valdeorresa. Malia todo, A Rúa de Valdeorras celebra estes días unha nova edición da BacoFesta, que dende a súa creación no 2014 supón un punto de encontro para veciños e visitantes.

O venres tivo lugar a inauguración da edición deste ano desta feira romana e gastronómica que busca pór en valor a historia, os viños e a gastronomía da Rúa e da comarca, homenaxeando ás raíces romanas da vila.

Ao acto acudiron as alcaldesas de Petín e A Rúa, Raquel Bautista e María González Albert, e mais membros do grupo de goberno rues, como o concelleiro de cultura, Vicente Solarat, e o tenente de alcalde, Luis Fernández Gudiña.

Tamén estiveron presentes a delegada especial da Deputación para Valdeorras, María del Carmen González, e o fillo adoptivo da localidade, o exbaloncestista do Real Madrid Wayne Brabender.

Todos xuntos deron un paseo dende A Ponte da Cigarrosa ata o recinto feiral do Aguillón, onde onte e hoxe os adegueiros da zona ofrecen o seu viño nesta festa dedicada á Baco, deus romano do viño.

O primeiro día actuaron Los Lobos, que interpretou cancións de Leiva e Pereza. Onte foi a quenda do grupo Generación G, banda tributo a Hombres G. E hoxe está prevista actuación da banda de hard rock español Mojinos Escozíos.