O concerto solidario terá continuidade en vindeiras edicións

O concerto solidario celebrado o pasado 29 de marzo no auditorio da vila do Támega, unha iniciativa da ANPA do Conservatorio, tivo unha gran acollida tanto en participación como en recadación, ao reunir 1.130 euros que se repartiron equitativamente entre as cinco organizacións sociais da comarca: Femuro, Cáritas, Cruz Vermella, CDR Portas Abertas e a Asociación Española Contra o Cancro.

Máis de 200 persoas asistiron ás actuacións da Minibanda CMUS de Verín, a Banda de Música de Verín, o Coro do Conservatorio, a Coral de Verín e o grupo de acordeóns “Sons do Mestremiro”. Ademais, previamente ao concerto, o público puido visitar na entrada os expositores informativos das entidades colaboradoras.

O éxito do formato abre a porta a futuras edicións. Dende o Concello márcanse o obxectivo de ampliar a programación en vindeiros anos a outros sectores da poboación, especialmente a xente nova, con propostas específicas nas actividades musicais e sociais do Conservatorio.

"Exemplo de colaboración"

O concelleiro responsable da área de Conservatorio, Diego Lourenzo, destacou do evento que “non só foi unha mostra do talento musical da vila, senón tamén do seu compromiso solidario. Foi un exemplo de colaboración entre institucións, alumnado, familias e tecido social”.